SHH-Spezial: Gründungsmitglieder
- Schärbähufä
- 17. Apr.
- 6 Min. Lesezeit
Aktualisiert: vor 7 Tagen
Ein Blick zurück und ein Blick nach vorn: Unsere Aktiv-Gründungsmitglieder erzählen! 🎺🎭
Was macht eine Gugge aus? Die Musik? Die Gwändli? Die Auftritte? Klar!
Aber vor allem sind es die Menschen, die sie zum Leben erwecken – und niemand weiss das besser als unsere Aktiv-Gründungsmitglieder. 🩷
Sie waren von Anfang an Teil der verrückten Idee namens Schärbähufä.
Haben mitgedacht, mitorganisiert, mitgebaut – und das Fundament gelegt, auf dem wir heute stehen. Haben legendäre Fasnächte erlebt, verrückte Geschichten geschrieben und jedes Jahr neue „Erstmäuche“ herzlich aufgenommen. Mit Gänsehautmomenten, echten Freundschaften und dieser unverwechselbaren Schärbähufä-Energie.
Und heute? Erzählen sie diese Geschichten weiter – mit leuchtenden Augen und einem breiten Grinsen. 🥳
Ein riesiges Danke an Esi (Roli) und Roli für diese kurzen Einblicke in 31 Jahre Schärbähufä!
Interview mit den Gründungsmitglieder
Wie isch d'Idee de Schärbähufä z'gründe entstande?
Esi: „Ech weiss, dass die Idee vom Roli Liem und vom Claudio Lötscher cho esch.“
Roli: „Das isch so, mier hend üs im Cafe Lopper s erscht mal troffä und über üsi gemeinsami Absicht diskutiert.“
Wieso heisst eyse Verein überhaupt "Schärbähufä"?
Esi: „offiziell heissts ja - well die erst Prob e so tönt hed 🙂.“
Roli: „D Idee isch vom Liem Kusi cho. Mier hend än Zämähang gsuecht mit Hergiswil. Glasi, Glas, Schärbä, Schärbähufä. Danach isch scho sehr schnell au d Idee cho vom Altglas. Aso analog «Loppergnome / Altgnomä».“
Was isch eyses allererste Lied im Repertoire gsi?
Esi: „A de erste Fasnacht hend mir Marina, La Cucaracha ond To Brazil gspielt. sLied vo Bonanza hend mer probet aber schlussendlich nie gspielt.“
Roli: „Ich glaub, dass mier no s Lied «s Marie hed Holzschuhe ah» gspielt hend.“
Wie ischs zu eysem erste Uiftritt cho – und wie isch dä abgluffe?
Esi: „Also am erste Schmudo hend mier bim Vater vom Bruno Achermann (euse ersti Obergugger) es Ständli (sBrazil) vor em Huus gspielt. Wenn mier a de erste Fasnacht eusi 3 Lieder gspielt hend ond sPublikum no eis hed welle ghöre, denn hend mier eifach s'erste no einisch gspielt.“
Roli: „Das weiss ich nömmä wo dä erschti Uftritt gsi isch. Glaub, dä Roli hed rächt…
Ich weiss no vo dä erschtä Uftritt in Stans am Schmudo. Obwohl mier kei offizielle Erlaubnis zum spielä gha hend, hemmer bim Hotel Ängel und vor äm Restaurant Tell gspielt. Da sind scho ganz viu ufmerksam wordä um üs 😅.“
Gids en Gschicht usem erste Jahr, wo dier bis hüt im Chopf bliebe isch?
Esi: „Euse aller ersti Umzug bi de Dünkelweier Zunft (in Lozärn 🙂) bi strömendem Räge (also waggrächt).“
Roli: „Üses Sujet «Clown» isch unerwartet guet acho und het auch sehr schön usgseh, obwohl äs sehr eifach und sehr choschtägünschtig gsi isch. Sehr viu Hergiswiler hend huärä freud gha a üs und hend üs au finanziell unterstützt.“
Wie hed sich de Schärbähufä im Lauf vu de Zeyt verändered – und was isch bis hüt gliich?
Esi: „Musikalisch het sich viel veränderet, de zämehalt esch immer no gliich wie früehner und mier nämid eus au immer no ned allzu ernst.“
Roli: „Sehr äs grosses Jahresprogramm gägä über vo frühener. Dä Zämähalt isch immer besser wordä, Dä Style und dä Chrarakter vom Verein isch immer no einzigartig und hebt ab vo anderä Guggemusigä.“
Wie isch es für dich z'gseh, wie jedes Jahr neui Leyt dezuechemmid?
Esi: „Esch doch eigentlich immer spanned gsi. Es sind natürlich au immer weder Lüüt gange - wo ech ned gärn lo go ha.“
Roli: „Äs chömid immer neui Lüt dezue und leider gönd au immer wieder usä. Sehr schön isch, dass viu Chind us dä Schärbähufä Familie dezuä chemid. Aso die Jungä vo dä Altä Mitglieder. Äs sind aso scho zwei Generationä debii. D Zahl vo dä Mitglieder isch scho sid vielnä Jahrä stabil.“
Es gid bi üs Itritt vu 1994 bis 2025 – werum dänksch du, bleybed so viel Mitglieder so lang im Verein?
Esi: „Ech glaub es hilft scho, dass äbe es paar scho sehr lang dr bii sind ond mier au durch das altersmässig so durchmischt sind
- ond mier sind halt eifach immer en geile Hufä gsi.“
Roli: „D Durmischig vo Alt und Jung machts us.“
Mittlerwiile gids Mitglieder, wo d'Eltere (under anderem ier sälber) früener oder hüt aktiv sind. Isch das plant gsi – oder hender sie unbewusst füre Schärbähufä "grosszoge"?
Esi: „Also ech persönlich be eigentlich nor wegm Schärbähufä Papi worde ond dGugge hed denn das Frölein grosszoge.“
Antwort aus der Redaktion: Vater, das erchlärt so einiges wieso ich so worde bi wie ich bi… 😂
Roli: „Ich ha nach 7 Jahr än Schärbähufä-Pausä gmacht und denn 3 potenzielli Schärbähufä Mitglieder produziert. Nachwuchs isch doch wichtig. So hends au viu anderi Mitglieder gmacht.
Hie äs paar Nämä: Aline, Ale, Max, Pätzi, Dion, Moana, Nils, … und s wärdid no meh cho! 😁“
Antwort aus der Redaktion: Ich glaube de ganzi Stammbaum z‘erchläre wer mit wem und wie verwandt isch im Schärbähufä würd das SHH-Spezial hie spränge. Aber vu üsne Gründigsmitglieder wärs:
Esi => Aline
Roli => Ale, Pätzi, Max
Mier sind altersmässig bunt durchmischt (18 bis 59 Jahr) – isch das scho immer so gsi? Und was chönnt de Grund defür sii?
Esi: „Dass hed sich erst met de Ziit e so ergäh, aber de Roli Liem esch scho im erste Jahr met grossem Abstand dr ältisch gsi. 😁“
Roli: „Die bunti Durchmischig hed sich natürlich erscht mit dä Jahrä ergäh. Die Jungä sind i Verein cho und die altä sind blubä oder wieder cho.“
Ier zwei sind scho vorem Schärbähufä befründet gsi – wie hed sich eychi Fründschaft über die letzte 31 Jahre im Schärbähufä veränderet?
Esi: „Mier hend halt au viel zäme erlebt i dene 31 Jahr bim Schärbähufä ond dör dass esch eusi Fründschaft sicher enger worde.“
Roli: „Nei, mier hend üs bi de Vereinsgründig erscht richtig kennä glernt. Vorhär hemmer eifach gwüsst, dass äs üs git. Und ja, mier hend sehr viu zämä erläbt, im Verein, au Privat und Geschäftlich. Dä Roli isch eifach än geilä Siech und ich bi sicher, dass mier, wemmer ganz alt sind, no Fründä wärdid sii. Ich wirdä au d Laudatio am Begräbnis vom Roli haltä, das han ich ihm versprochä…“
Wie fühlt es sich ah, de Schärbähufä hüt z'erlebe – mit all dene Gschichte im Hinderchopf?
Esi: „Es het eigentlich im Hinderchopf fast nümme platz… Zum Glück wüssid ihr ned alles (ond mier hend s einte oder andere verdrängt).“
Roli: „Ich erläbä hüt dä Schärbähufä als Vereinsfamilie. Dä Verein isch eifach einmalig, luschtig, kreativ und nömmä wäg z dänkä in Nidwaldä.“
Was isch für dich de schönst oder verrücktischt Momänt gsi i all dene Jahr?
Esi: „De schönst Momänt esch in Saint-Maurice gsi, wo dColette Gugge betreuig gmacht het.“
Roli: „Äs sind so viu unglaublich schöni und verrückti Momänt gsi i all denä Jahr, da chönntsch äs Buech schriibä.“
Antwort aus der Redaktion: Da hemmer üses nöchste Guggeprojekt! „Best of Schärbähufä“😂.
Wieso bisch du nach all dere Zeyt nu im Verein?
Esi: „Ech ha vor 23 Jahr - bi de Geburt vo minere Tochter - de Abgang verpasst ond nachher heds kei Sinn me gmacht üfzhöre. Be immer no sehr gärn im Verein und es passt eifach.“
Roli: „Äs sind eifach viu gueti Mänschä debii, äbä än Familie. Wägg vom Alltag, Musig machä, uf dä Bühni stah, zämä siii, trinkä, fäschtä und und und…“
Was würsch du öpperem säge, wo no zögered zum Schärbähufä z'cho?
Esi: „Mier sind werkli e Family ond mier gsend halt alli au unglaublich guet us (scho set Jahrzähnte).“
Roli: „Ich chönnts ned besser sägä.“
Fazit – „Wo alles begann und nie aufgehört hat“
Sie haben die ersten Noten gespielt, die ersten Gwändli getragen und die ersten Auftritte gemeistert – und stehen immer noch mit voller Leidenschaft mittendrin.
Nicht, weil sie es müssen – sondern weil sie es einfach nicht anders wollen.
Weil man beim Schärbähufä ankommt, bleibt – und jedes Jahr neu spürt, warum es sich lohnt. Vielleicht ist genau das der Grund, warum in den letzten Jahren auch viele Altbekannte wieder den Weg zurück zu uns gefunden haben. 😉
Was vor über 30 Jahren begann, wird heute genauso weitergelebt – mit neuem Wind, neuen Gesichtern und dem gleichen unverwechselbaren Schärbähufä-Charakter.
Egal, ob du seit 15 Jahren dabei bist oder seit 15 Minuten am Infoabend sitzt – beim Schärbähufä sind alle gleich willkommen.
Noch unsicher? Dann wag den ersten Schritt!
👉 Am 17. April findet unser Neumitglieder-Infoabend statt – und gleich danach steigt die legendäre öffentliche Osterparty! 🐣🍻
Eine bessere Gelegenheit, den Schärbähufä kennenzulernen, gibt’s nicht.
Und wer weiss – vielleicht bist genau DU bald Teil der nächsten Generation, die in ein paar Jahren sagt: „Es hed mit eysem Infoabig agfange…“ 😉🎉
Weiter geht’s mit SHH-Spezial: {Wird noch bekannt gegeben} 👀
